30 ilə yaxındır ki, yüz minlərlə məcburi köçkün Bakı və ölkənin digər şəhərlərinin yataqxanalarında və başqa “müvəqqəti mənzillərdə” yerləşib. Onlar 1988-1994-cü illərdə Ermənistan-Azərbaycan müharibəsi zamanı müxtəlif təyinatlı binalarda, çadır şəhərciklərində, vaqonlarda və digər tikililərdə məskunlaşıb, nəticədə 1,14 milyon azərbaycanlı Qarabağ və Ermənistandan didərgin düşüb.
1993-cü ildən 2013-cü ilə qədər olan 20 il ərzində Azərbaycan hökuməti müharibə zamanı məcburi köçkün düşmüş azərbaycanlıların həyatını yaxşılaşdırmaq üçün 5,5 milyard dollar xərcləyib - onun 2,5 milyardı dövlət büdcəsindən, 1,9 milyardı Dövlət Neft Fondundan, 1,1 milyardı isə beynəlxalq humanitar təşkilatlardandır. Hazırda Azərbaycanda 49 beynəlxalq və 43 yerli humanitar təşkilat qaçqınlara, məcburi köçkünlərə və aztəminatlı insanlara yardım göstərir.
Bu səylərə baxmayaraq, təxminən 300 mindən çox vətəndaş hələ də yaşayış üçün nəzərdə tutulmayan binalarda yaşayır. İnsanlar həyatlarındakı bütün əlamətdar hadisələri nazik divarlarla ayrılan otaqlarda qeyd edirlər. Nə şəxsi məkan var, nə də ortabab şərait.
Kənardan baxanda yataqxana sakinlərinin gündəlik qarşılaşdıqları çətinlikləri xırdalıqlarına qədər təsəvvür etmək, demək olar ki, mümkün deyil. Chai Khana fotoşəkillərdən, illüstrasiyalardan və müsahibələrdən istifadə edərək Azərbaycan Dillər Universitetinin 1 saylı yataqxanasının interaktiv - 360 dərəcə modelini yaradıb. Bələdçi tura klikləməklə məcburi köçkünün yaşayışını bir günlük təcrübədən keçirin.